Indung

                                                                        Ayatrohaedi
Iuh tanjung seungitna marganing wuyung
liuh indung perbawa nu cadu nundung
mun di dunya ngan aya indung jeung bapa
bakal bisa ngawasa sajagat raya
Ngan indung memeh miang dielingan,
“Lamun hirup ngan ngumbar karep sorangan
temahna poho ka indung
kaduhung nunggu di tuntung
nya hanjakal bakal jadi incu cikal.”

2001:88


Pamanggih
Ayatrohaedi

Salapan bulan ngakandung
Moal aya hiji jalma
leuwih ti indung micinta
indung gudang hampura
Salapan bulan dikandung
Moal aya hiji jalma
leuwih ti anak rumasa
anak gudang dosa
Salapan bulan ngakandung
Pinuh rasa jeung rumasa
Salapan bulan dikandung
Pinuh dosa jeung rumasa

2001:84

sumber : metasastra.wordpress.com

 

SAPANJANG RINGKANG
Titang N.
Naon deui nu rek dicatetkeun sapanjang usum dang-dangrat
Carita lawas, lalakon nu teu kungsi kalakonan
Atawa medar sesa umur nu arucutan tina simpayna ?
Kabeh geus tilem dina tamperan kakangen, kakangen
Nu sok nguramasan sakur implengan jeung ciciptaan


Di dieu ngijih geus jarang nganjang, katiga geus langka midang
Sariak layung kari geterna na wanci nu lingsir sapanyeupahan
Sedeng kesang teu reureuh nguyumbang ti trotoar ka trotoar
Ti kolomberan ka kolong jembatan, ti emper toko ka diskotik
Jadi baruang nu haben deui saban halabhabna raga


Naon deui nu rek di catetkeun sapanjang usum dang-dangrat
Mangpirang kalangkang impian, harepan nu karahaan
Atawa sukma nu disebakeun beurang peuting
Kapan batin tigerat salawasna , salawasna 
Langgeng mitineung galindeng sarakan


di dieu urang paninggaran nu leungiteun udagan 
Samar kana juringkang ringkang sorangan
Kasarung satengahing rerembet kota
Kapidangdungneangan jalan pangbalikan
Sanggeus rurungga ajal ngagerihan saban lengkah


Sancang, 12.